Hallo Mia,
hier iss Ännchen.
Du, isch muß der gaaaaanz viel erzähle. Was isch alles erlebt hab, nachdem isch bei eusch losgefahrn bin! Des kannste der gar net vorstelle!
Günni war ganz ok, net so nett wie de Manni, abber schon in Ordnung. Mer habbe e bissi geschwätzt unn dann warn mer aach schon fast bei mir dahaam. Kaa Spur von Mamma odder Georges! Günni hat sisch Sorje gemacht, abber isch hab em gesacht, des wär so schon in Ordnung, die beide käme sischer gleisch. Hmmmpf, sie kame net. Ich saß da so uff meiner Leitplank, mei Köffersche unner mer unn hab ibberlescht, was ich jetz mach. Nach Ewischkeite, isch dacht grad, jetz fliesch isch los, schließlich waaß icsh ja, wo isch wohn, da seh isch en Habischt fliesche! Oi Jesses, habb isch gedacht, jetz werd's eng. Wo kann isch'n jetz hie? Da hat misch der Kerl aach schon gesehe unn kimmt im Storzfluch erunner. Direkt nebe misch! Mia, isch habb gedacht, mei letzt Stündsche hätt geschlaache! Abber der iss neber mer gelandet unn hat gemaant, er wär de Falco unn was isch da mache dät. Habb isch geguckt! En scheene Kerl war des! En Mords-Schnabbel, Aache, ganz steschend, abber schee, Kralle, so was habb isch noch nie gesehe! Isch habb dann erst ema geschluckt unn dann mein Name gesacht. Wie er die ganse Tiddel gehert hat, war er ganz schee beeindruckt. Abber wie er gehört hat, daß isch uff mei Mama wart, hat er gelacht. Des war mer dann schon e bissi peinlisch. Na ja, die iss ja aach net gekomme. Da hat er misch dann eingelaade, ob isch net mit zu em wollt. In sein Horst. Ei, was waaß dann isch, was en Horst iss? Isch binn dann halt mit em los geflooche unn isch dacht, mer komme nie an. Abber uff ema warn mer in seim Nest. Na ja, isch bin dann halt mit em gesesse unn mer habbe uns e bissi unnerhalte! Er hat gesacht, er hädd misch schon in Kahl gesehe, da wär isch em schon uffgefalle, weil isch so schee bunt wär. Unn er hädd misch eischentlisch schon immer ema kenne lerne wolle, abber immer, wenn er hätt uff meiner
Voliere lande wolle, wär isch rin gegange. Ei, hab isch gesacht, da habb isch misch halt immer erschreckt. Er hat mer dann erzählt, wie schee isch wär unn vor allem, so schee bunt. So was hedd er noch niee gesehe, außer bei mir. Ach, Mia, war des schee, was der mer alles erzählt hat! Jedenfalls isses dann dunkel geworn unn isch hab nix mehr gesehe. Isch habb em dann gesacht, daß isch eischentlisch haam müßt, weil mei Mamma dät sich Sorje mache, abber da hadder nur gelacht. Er hat verschproche, er dät mer nix due unn isch sollt doch bei em ibbernachte. Des habb isch dann aach gemacht! Er hadd misch aach net aagerührt, sonnern misch schee warm gehalte. Isch habb eischentlisch gut geschlafe. Am annern Moin isser dann Friehstick hole gefloche! Isch habb misch schon gefreut, unn dann kimmt der Kerl mit erer Maus aa! Unn lescht mer die hie! Wie isch gesacht habb, isch hätt lieber e paar Körner odder e bissi Obst odder Gemies, hadder misch aageguckt, als hädd isch se nemmer all. Also, Mia, isch habb gedacht, isch spinn! E Maus, zum Friehstick! Nee, werklisch net. So schee war der Kerl aach widder net. Unn wie isch des so zu em sach, hadder gemaant, isch sollt misch abmache unn gugge, wo isch mei Mamma her bekäm. Isch sei ja wohl zu bleed, um zu begreife, was schmegge dät!
Ei da binn isch dann halt losgelaafe mit meim Köffersche unn dorsch de Wald marschiert. Weil, isch wußt ja net, wo isch war. Erschendwann binn isch dann uff e Straß gekomme unn bin dann die entlang gelaafe. Unn gereschent hats! Jesses, isch war naß bis uff die Haut. Rischtisch eklisch. Unn dann habb isch doch e bissi nach meiner Mamma geflennt! Unn Hunger hab isch gehabt! Unn dann kam da uff ema e Audo unn des hat angehalde. Unn da kam de Georges eraus. Unn der hat misch uffgesammelt unn ganz lieb mit mer geschwetzt. Abber von meiner Mamma kaa Spur. Die war schaffe! Des war dere wischtischer als wie misch zu suche! Isch bin immer noch stinkisch uff se. Gestern abend hat se sisch dann zwar gefreut wie blee, abber isch redd nix mit dere. Noch net! Unn was isch gemacht hab, in dere Nacht, des geht die gar nix an!
Abber dir wollt isch des doch erzähle! Was aam so alles bassiern kann. Also, schee war de Falco ja, abber was der so fresse duut! Naa! Werklisch net! jetz waaß isch aach, warum der so ausm Hals gestunke hat. Des war es Einzische, was misch annem e bissi gestört hat. Abber isch hab halt gedacht, er hätt's am Maache! Unn debei frißt der Kerl Mäus!! Iiih! Nee, da bin isch dehaam besser uffgehobe. Klang zwar alles schee, was der so erzählt hat, von de unendlisch Freiheit, abber, dehaam, des hat halt aach was. Unn Plätzjer gibt's da drausse aach net unn kaaner kimmt vorbei unn gibt mer e Nüßje. Nee, iss doch schon ganz gut hier dehaam! Abber die Mama, die soll sisch doch noch e bissi Sorsche mache, wo isch gewese bin!
Abber bei eusch, des war rischtisch schee! Hat mer arsch guud gefalle!
Ach, was ganz Schlimmes muß isch der abber noch saache. Wie isch da so dorsch de Wald gelaafe bin, da habb isch erschendwo wie's gedonnert hat, de Foddo-abberat verlorn. Unn isch habb des aach gar net gleisch gemerkt. Erst wie isch dehaam war un mei Köffersche ausgepackt habb. Da habb isch dann de Foddo gesucht unn der war fort. Auwei, des gibbt hier bestimmt aach noch Ärscher, wenn die des merke, daß de Foddo fort iss. Abber waaste, wie mir des stinkt! Die ganze scheene Foddos, die wo mer gemacht habbe! Unn so schee sinse geworn. Unn so dolle Sache dezwische! Unn wie de disch aagestrengt hast, daß mer die Foddos mache konnde! Unn jetz iss des Ding fort! Isch könnt mer wohie beisse! Vielleischt redd isch ema mit dem Mäxche, unserm Hund, der leeft da manschmal rum. Wenner was finne duut, dann soll er des mitbringe! Vielleischt sinn ja dann die Foddos noch druff. Ach, so en Mist abber aach! Unn nur, weil die net pünktlisch war!
Mei Mamma iss an allem schuld.
Isch könnt flenne!
Abber trotzdem, soooo schee war's gewese bei eusch!
Isch habb eusch alle drei rischtisch lieb! Grüß mer die Rinus unn de Max. Unn erzähl dene nix von dere Nacht, net, daß die petze due!
Ganz viele Grieß
von Deiner Freundin
Ännchen
rima: 
. Außerdem hatten wir Graupis noch nie zu Besuch. Ich verspreche mir dadurch eine Verbesserung der sozialen Kompetenz für Mia und Max. Sie sollen lernen, dass andere Kontinente gleichberechtigte und ähnlich fühlende Wesen hervorbringen, so wie sie es von ihresgleichen gewohnt sind. Im Übrigen wird Max sich freuen, Kumpels aus der Heimat zu treffen.
wie geht es den deiner lieben rinus? 
